Munaasabadda qori tuurka tartanka ayaa lagu qabtay
xarunta xiriirka Soomaaliyeed ee kubadda cagta, waxana kasoo qeyb galay xubno
ka tirsan guddiga fulinta xiriirka iyo cayaaryahanno hore oo qaran. Gudoomiyaha guddiga horumarinta dhallinyarada ahna xubin
ka tirsan guddiga fulinta xiriirka, Cabdalla Maxamuud Xersi, oo munaasabadda
qori tuurka ka hadlay ayaa sheegay in tartankan dhamaantiis uu yahay tartan
dhallinyaro.
"Xiriirka Soomaaliyeed ee kubbadda cagtu wuxuu qabanayaa
tartanka dhallinyarada sanadkii lixaad oo xiriir ah. Kooxaha ka qeyb galaya
waxaa matalaya dhallinyaro 14-15 jirro ah, maadaama tartanku uu yahay tartan
dhallinyaro, waxaa loo soo xulay garsooreyaal aad u da’yar oo dhammaan
cayaaraha dhex dhexaadin doona” sidaas waxaa yiri guddoomiyaha guddiga horumarinta
dhallinyarada ee xiriirka Soomaaliyeed ee kubbadda cagta, Cabdalla Maxamuud
Xersi, oo intaa raaciyay in sanadkan ay tartanka ka qeyb galayaan ku dhawaad
400 oo caruur ah.
Guddoomiye ku xigeenka 1-aad ee xiriirka kubbadda cagta Soomaaliya, Cali Cabdi Maxamed, ayaa dhankiisa sheegay in cudurka Covid-19 ee dunida oo dhan saameeyay awgiis sanadkan kooxaha tartanka ka qeyb galaya loo qeybiyay afar qeybood, halka markii hore uu tartanku laba wareeg ahaan jiray.
"Muhiimmadda ugu weyn ee qabashada tartakan aan ka leenahay waa in carruur aad u da’yar lagu bar-baariyo kubbadda cagta si loo soo saaro cayaartoy da’ yar oo tayo wanaagsan leh”ayuu yiri guddoomiye ku xigeenku.
"Ilaa iyo hadda natiijooyin wanaagsan ayaa laga gaaray qabashada tartanka, sdia aan wada xusuusanana xulkii qaranka ee Soomaaliya markeedii ugu horreysay gaarsiiyay kama dambeysta cayaarihii CECAFA ee dhallinta da’doodu ka yartahay 17-ka sano waxaa lagusoo saaray horyaalka dhallinyarada”ayuu yiri guddoomiye ku xigeenka 1-aad ee xiriirka kubbadda cagta Soomaaliya. Tartanka ayaa sida la shaaciyay furmi doona maalinta Arbacada ah ee inasoo aadan oo bisha September ku geegan tahay 2.
Somali Football Federation Media Department
Email:info@somsoccer.com